Soekvorm

Madiu int

Buki ana alamani weaqina

Madiu wese ana wawa Libai. Tauna Diu ʼolotona, ta ena fewa takesi ʼewaʼewa dadana me Diu ʼidiega Loma gabemani weaqidi. Baʼe ʼiuna ʼinega me Diu Madiu ge ida ʼawahaqiaqiea, ta Ieisu nuakolokoloyea ʼinega gabei mai ʼinaya ta ʼabibodea.

Buki baʼe Ieisu Valena weaqina Madiu ʼwayavia ena tomotauyavo me Diu weaqidi. ʼInega yani qabuna Ieisu ena viʼoi ʼinega be tautauya ana laba yaʼitoto ʼevivi ʼaligega weaqina ʼwayavia ʼidia. ʼInega ena veʼita waiwaina be, ena viaqa ʼebenuavoqana be waiwaidi ta wese ena ʼaliga ʼetoluai ʼinaya weaqina simana ʼifoqeyedi ena ʼwayavi qabuna ʼidiega.

Ibeliu bonadiega Yaubada Natuna igabea Toʼetoyavua (Mesaia) ta Guliki bonadiega ana alamani Keliso. Tauna Mesaia nana me Diu ibaʼebaʼeyea vonigo totutaya namai be naʼetoyavuidi Loma gabemani edi luvine waiwaina ʼinega. Me Diu edi tovanugwetayavo Ieisu ena mai ʼiuna ivemwageyea, ta wese tomotau qabudi nuadi voqana. Ta Madiu nuanuana ena tomotauyavo naveʼitedi Ieisu tauna vonahaqiaqi Keliso, me Diu edi Toluvine Qiduana, ʼinega simana ʼidia Ieisu ena ʼevivi mai ana tuta ʼinaya naʼifoqe kavona Kini ʼidewani.

Ta wese vaina vona fofofola nugwenugweina ʼinanedi Yaubada ena venuaʼivina weaqina, ta vona diavona adi aqiaqi veʼifoqeyea Ieisu ʼinega.

Madiu vaina yani ʼenaʼenaʼina weaqidi ʼwayavia ʼidewani Ieisu ena veʼita veʼaidega weaqina Yaubada ena yoʼo gamonaya. Ta wese ena vona sesebai ʼeala ʼwaiʼwaividi tomotau edi lugu mahala ena ʼEbeluvine gamonaya weaqina.

Buki gamona

1:1–2:23 Ieisu Keliso tubunavo ta wese ena viʼoi weaqina

3:1-12 Ioni Togivebabitaiso ena viaqayavo

3:13–4:11 Ieisu ena babitaiso ta wese ana sitonova

4:12–18:35 Ieisu ena viaqayavo tomotau nuanidia diʼwe Galili ʼinaya

19:1–20:34 Ieisu Galili nogea ta tauya Ielusalema ʼinaya

21:1–27:66 Ieisu ena wiki ʼebeluʼovoa

28:1-15 Ieisu ena yaʼitoto ʼevivi ʼaligega ta wese ena ʼifoqe tomotau ʼidia

28:16-20 Ieisu ana tovetumaqanayavo adi veyoveyoa neidi